Roedd William ac Edward Andrews ymysg y cannoedd o blant a gollodd eu cartrefi a’u hysgolion yn Lerpwl yn ystod yr Ail Ryfel Byd. Cawsant eu hanfon i wahanol rannau o Orllewin Cymru a bu’r ddau frawd yn ffodus i gael eu hanfon i Bencader rhwng 1941 a 1944. Buont yn byw yn y tŷ a elwir Rhianfa heddiw ar ffordd Caerfyrddin, gan fynychu ysgol ar wahân tu cefn Capel Tabernacl.

Er taw bechgyn ifanc oeddynt ar y pryd, mae ganddynt atgofion hapus o’u cyfnod yma, ac maent yn dod yn ôl i ymweld â’r ardal yn gyson. Maent hefyd wedi creu DVD yn sôn am y llefydd a’r digwyddiadau a fu’n bwysig iddynt yn y cyfnod.

Mi wnaethon gysylltu ar ôl gweld nodyn ar y wefan gymunedol newydd yn holi am wybodaeth ar y Faciwîs o Lerpwl ym Mhencader, a chael sgwrs ddifyr gyda’r Ysgrifennydd.

O ddeall eu bod yn mynd i ymweld â’r ardal yn y gwanwyn, awgrymwyd y dylent fynychu’r cyfarfod nesaf o’r Grŵp Adfywio ym mis Ebrill a rhoi sgwrs am eu hatgofion o’r pentref yn y cyfnod. Os oeddech chi hefyd yn faciwî yma, neu adnabod rhywun a fu, neu os hoffech glywed mwy, mae croeso i chi ddod draw i’r Pafiliwn ar nos Lun yr 8fed o Ebrill 2013 am 7:30yp.